الكاتب رامي كوسا

شوفوا، هي الدهلزة تبع أنّو “كل ما يتعلق بالنظام البائد خ ***”، استثمرتوا فيها لنشّفتوا دمنا.
الطبابة المجانية، اللي كان جمهوركن يسخر منها، كانت ساترة أمم.
والتعليم المجاني، اللي كان جمهوركن يسخر منّو، خرّج مهندسين وأطبّاء وفنّانين وصحفيين وحقوقيين عملوا وأنجزوا وليكهن عم يشتغلوا بدول أنظمة عملها معيارية وعاملين نتائج بتاخد العقل…

من لمّا استلمتوا، وانتو عم تستبيحوا كل شي، على الرغم من أنّه الإعلان الدستوري لا يتيح لجنابكن تعملوا ربع اللي عم تعملوه..
بدكن تخصخصوا مشافي الدولة؟ بحق شو؟ مين أنتو أصلاً؟ مشافي الدولة يعني مشافي تعمّرت من ضرايب اقتطعت من دخل جدّي وأبي ومن بعدهن أنا، يعني حالة خدمية انبنت من عرق جبين السوريين على مدى عقود، جايين بهالبساطة تسلموها للقطّاع الخاص؟
معشر المطبّلين للسلطة، بيسوى تعرفوا شغلة:
خصخصة المشافي الحكومية، بتعني أنّو المستشفى ما عاد ملزم يستقبل ولادك إذا ما معك مبلغ وقدره، وماني عم بالغ، في لبنان ياما ناس ميتين على عتبات المستشفيات لأنّهن فقراء..
وأنا ميسور الحمدلله، قدران أسكت وقول ما دخلني، بس عم بحكي لأجل مستقبلنا، مستقبلنا كلنا…
العترة عاللي مو ملاقي ياكل، ورح يضطر يشوف ولاده عم يدبلوا قدامه ومو قدران يعالجهن بمستشفيات كانت إله وتم نهبها لصالح زمرة ركبت عكتافنا بحجة “حررناكن” و”المخطوفة لا تسأل لوين آخديني”.

علاج السرطان بسوريا كان بجزء لا بأس به منه مجاني، ليش أدوية السرطان اليوم مفقودة من المستشفيات وعم تنباع بالسوق السوداء؟
مين الجحش ابن الجحش اللي مفهمكن انو هيك بصير الانتقال من اقتصاد اشتراكي إلى اقتصاد سوق مفتوح؟
لك ربطة الخبز رفعتوا حقها 10 أضعاف بمجرد قعدتوا عالكرسي!!
الكهربا، صارت كابوس!!
لحقتوا الناس على صحتها وعافيتها؟
طيّب بشار الأسد كان محاصر مو؟ عقوبات أميركيا وقطيعة مع الكوكب صح؟
مع هيك كان قدران يحافظ على سعر ربطة الخبز متدني، وعلى طبابة وتعليم مجانيين (بغض النظر عن رأيكن بمستوى الطبابة والتعليم، ورأيكن مو مهم الحقيقة، لأنّو الحاصل انو ما في سوري ما كان بيقدر يبعت ولاده عالمدرسة وما في سوري إلّا وبلاقي طبيب يكشف على وضعه حتى لو كانت الـ Facilities سيئة).
انتو مفروض اموركن باللوج!! انرفعت العقوبات، ومشاريع بالمليارات، وحملات تبرع بمئات ملايين الدولارات، وعلاقة هائلة مع دول الخليج، وترامب عم يرشلكن بارفان، كيف بشار الأسد المحاصر كان قدران يأمن هي الأساسيات وأنتو لاء؟ (جماعة: “:يعني انت مع بشار الأسد؟” … أنتو محسوبين عالدواب كونه هاد اللي فهمتوه من المنشور، وبالتالي لا تسمعني حسك، حالك حال زمرة الطرش تبع “وين كنت من 14 سنة”).

سوريّات وسوريين:
البلد عم تنباع يا بابا، وشوي شوي رح تتحوّل لـ”نيو داماسكوس” مخصصة للذوات، أما الفقراء، وهم غالبيتنا بطبيعة الحال، رح ينتركوا لبيوت الصفيح ومجمّعات القمامة البشرية، ينكبسوا حتى ما يشوهوا الوجه الحضاري للبلد.
لا تفكّروا مرتين قبل ما تنزلوا عالشوارع في أوّل دعوة منظمة، بعد شوي رح يشلحوكن ضو عيونكن ويعطوه للقطاع الخاص…