مفاجأة الحقيقة..
مفتي سوريا السابق الشيخ أحمد حسون.. اتحكم عليه في محاكمة هزلية جولانية بالسجن مدى الحياة.
المفاجأة انهم مأعدموهوش زي بقية الأحكام الجاهزة في المحاكمات السورية المضحكة.
إيه التهم؟ أنه كان ضد الثورة.. ومدعمش الثورة السلمية الشريفة.. اللي عملتها القاعدة بقيادة الجولاني ورفاقه بالمدافع الرشاشة تحت غطاء المدفعية التركية وصواريخ إسرائيل وطيران الناتو. لأنه “كان ثوخنن وطائش وكميل”.
ومن ضمن تهمه أنه فضل مفتي للدولة. ماتحولش مفتي للناتو زي القرضاوي.
وأنه رفض الوجود التركي في سوريا…!!!
يا ترى سوريا كان فيها ثورة؟
هل دي كانت ثورة فعلا؟
وليه الثوار الأطهار اللي حرروا الوطن وحاربوا روسيا وجيش سوريا وإيران مع بعض.. حسب زعمهم.. واقفين يتفرجوا على إسرائيل بتاخد ارضهم دلوقتي؟
ألا ما في واحد.. واحد بس.. ضرب طلقة على جندي اسرائيلي!!
واحد حتى.. لحفظ ماء الوجه؟
الجاي دا هو قصة سوريا.
وقصة الثورة السورية المزعومة.
حقولك هي إبتدت إزاي.. وحتعرف لوحدك.
أن سوريا عمرها ما كان فيها ثورة.
المظاهرات في سوريا قبل الحرب السورية كانت شائعة ومعتادة، و كان عندهم مظاهرات دورية والتراس كورة.. واللي مايعرفش يدور في جوجل عن “أحداث القامشلي” بدل ما يقول لنا “الأمن كان بيبيد قرى” ويصدعنا.
في أحداث القامشلي مات ١٢ من الأمن السوري علي فكرة.. والسلطات السورية احتوت الموضوع.. والقامشلي ماتمش دكها بالمدفعية و لا حاجة.
- “مروة الغميان” كان ناشطة سياسية سورية وبتنظم مظاهرات وتكتب في صحف أيام بشار الأسد.. دعت للثورة السورية، وكانت بتعمل دا بدعم صفحة إليكترونية اسمها “الثورة السورية ضد بشار الأسد”.
الصفحة دي هي التوأم السوري لصفحة “كلنا خالد سعيد” في مصر.. وبيديرها واحد اسمه “فداء السيد طريف”.. إخواني سوري.. وطبعا مرجعش ينعم بالحرية.
دا من أيامها عايش ومقيم في السويد..!
“مروة غميان” هي معادل “توكل كرمان” في اليمن و”وائل غنيم” في مصر.. واتنططت في كل دول الربيع العربي المهبب.. و جت مصر عندنا حتى.. الفيديو في أول مرجع في التعليقات…
مروة حاليا مابتنعمش بالحرية في سوريا برضه…
مقيمة في تركيا…
- كان بشار الأسد فاتح حضنه للإخوان.. وفاتح حضنه لتركيا.. اللي ماتعرفوش بقى إن بنفس الأسلوب الإخواني وفي بطء وصبر خبيث.. تركيا عملت أنفاق بينها وبين سوريا.. زي عندنا بالضبط في سينا.
- السلاح دخل من الأنفاق.. و”مروة” راحت عاملة فيلم إنها تم الإعتداء عليها واغتصابها من قبل الأمن.. وبدأت تحرض المظاهرات على إنها تتحول لعنف.
وبدأ أنصارها يدفعوا الجموع لدا و تمشي سياسة القطيع.. فبدأوا بحرق محكمة درعا.. و مات فيها ٤ رجال أمن محروقين.. والفيديو دا في تالت مرجع…
- إتقبض علي “مروة” ودا كان مقصود منها وبتسعى إليه.. زي ما وائل غنيم بقى بطل لما اتقبض عليه هنا.
وسلمت “مروة” الراية إلي زميلها “هيثم مناع” زي ما وائل غنيم سلم الراية لأسماء محفوظ في مصر.. وكان الوضع في درعا في حالة إنفلات.
وهنا جت فرصة “هيثم مناع”.. وبدأ يباشر تمرير السلاح من الأنفاق التركية لحلب ومنها إلي لدرعا مع هواتف ساتيلايت تركية.. واعترف بدا بنفسه في الفيديو الي في رابع مرجع…
“هيثم مناع”.. تاجر الثورات و السلاح.. قاعد في أوروبا من مايو ١٩٧٨.. ومؤسس “اللجنة العربية لحقوق الإنسان”…!
- طبعا السلاح ماراحش هباء.. الشرطة اتقتلت بيه.
المصيبة الكبرى إن قوات الأمن السوري كانوا نازلين بسلاح صوت و مطاطي ودروع بلاستيك.. ودا أدى لمقتل ٤٢ شرطي.. لأن الشرطة فوجئت إنها مش نازلة لمحتجين ومتظاهرين بيرموا طوب.. لأ نازلة وسط محترفين إرهابيين مدربين بيضربوا نار.
دا خلاها خسرت قوات كتير وانسحبت .. نزلت القوات المسلحة السورية.. وبادلت المسلحين إطلاق النار..
- شوف بقى الاحتراف والتطابق مع الربيع المصري بالضبط.. بدأوا مهاجمة السجون!
هاجموا السجون.. واتعاون معاهم مساجين من الداخل.. وقتلوا حرس السجن واطلقوا سراح السجناء.
الموقف كان اشتعل.. وبدأت مجموعة تلبس لبس مموه وتسمي نفسها “الجيش الحر”.. تقتنص الضباط من الشرطة والجيش.. دول طبعا مش عازفي كمان ومدرسين فلسفة.. دي عصابات الأنفاق.. والمساجين الهاربين.. الكلام مثبت بخامس مرجع…
- برضه لحد دلوقتي الجيش السوري مسيطر بنسبة ٩٠%.. فجأة إتعمل كمين لأوتوبيس جيش سوري – افتكر أوتوبيس الجيش اللي فجروه عندنا في سيناء – وقتلوا كل الضباط و الجنود اللي فيه.. علي طريق اللاذقية – طرطوس في منطقة اسمها “بني إياس”.
الحافلة دي كانت مسلحة.. واتسرق كل السلاح اللي كان فيها…
- اتقتل مواطن بريء في “بني إياس” اسمه “نضال جنود” وقالوا إن الجيش السوري قتله بوحشية.. بس ظهر فيديو لاحقا للثوار الأطهار وهم بيقتلوه.. الفيديو دا سادس مرجع..
مين بقى اللي بيقتل المدنيين؟؟! سؤال صعب؟
- خرجت “مروة غميان” و “هيثم مناع” وباقي العصابة يتاجروا بدم “نضال جنود”.. وحصل تطور غاية في الغرابة.. “مروة” و “مناع” حشدوا مليونية “لتسليح” الجيش الحر…!
عملت مليونية ناجحة وجمعت فلوس وجه سلاح من الأنفاق و اتهرب من الحدود اللي طالتها الفوضى واتسلم للبلطجية و الصيع اللي مسميين نفسهم “الجيش الحر”.. والفيديو دا.. سابع مرجع…
- كتر السلاح وبقى طبيعي إن يبقي في الشارع في “مجموعات مسلحة” ماتعرفش هم مين وتبع مين.. واغتالوا الشهيد النقيب “باسل العلي”.. ودي بنته اللي عندها سبع سنين بتتكلم في ثامن فيديو…
الفيديو ده له أهمية خاصة لأنه صادر عن التليفزيون السوري.. خد بالك لحد اللحظة دي.. ٢٥ إبريل ٢٠١١.. كان الإعلام السوري بيحاول يأثر على “المتظاهرين” بالميديا…
اقرا كده الجملة اللي فاتت دي تاني و قل لي: “لو بيقصف المتظاهرين بالبراميل والنابالم.. بيعمل لهم بث زي دا ليه؟”
- “بتول” أم سبع سنين نعت أبوها يوم ٢٥ إبريل؟ جميل…
تعال بعد ٣ ايام فقط.. افرجك علي ميليشيا الإخوان الإرهابية في حمص.. و هم بيضربوا النار عشوائي وخارجين علي الناس بالمدافع الرشاشة.. اللي ينضم ويخضع أهلا به.. واللي يتقتل يلبسه النظام السوري كتهمة جاهزة.. الفيديو دا تاسع مرجع…
- السلاح اللي جه.. إتهاجمت بيه معسكرات الشرطة.. ومن المعسكرات دي خرج سلاح ثقيل.. مدرعات و أر بي جيه و جرينوف.. وبالسلاح دا.. بدأت الجماعات المسلحة تضرب الجيش..
النقطة دي فشلت في مصر عشان الشرطة انسحبت من الشوارع والأقسام وأمّنت معسكرات الأمن المركزي اللي فيها السلاح الثقيل.. وسابت الشارع كله للجيش…
- طلعت د. “بثينة شعبان” وقررت إن في حزمة إصلاحات دستورية وقانونية قادمة.. منها تعديل الدستور وتغيير قانون الأحزاب ووضع قانون للإعلام.. و إصلاح الوضع الإقتصادي.
فرد عليها القرضاوي بخطبة طويلة بيدعو فيها للجهاد المقدس ضد النظام السوري.
- خرج بشار الاسد بنفسه.. وعمل مؤتمر صحفي أعلن فيه حزمة إصلاحات.. والمصيبة بقى.. إن المؤتمر دا عامل زي خطاب الرئيس المرحوم مبارك عندنا بتاع الست شهور.. في ناس كتير اقتنعت وبدأت تفكر تروح بيوتها..
هنا بقى ظهرت الهتافات الطائفية.. واتغيرت اللهجة.. “لبشار الشيعي بيقتل السنة”.
مع إن الجيش السوري أكتر من نص قياداته و نصه من أهل السنة.
وفيه مسيحيين وشيعة وكل الملل والنحل.
بس الطائفية ولعت الموقف وبقت هي سيدة المرحلة دي.. دا سيادتك تشوفه في عاشر مرجع…
عايز مراجع وأكلة أن الكيماوي والكبتاجون كان شغل “الثوار”..؟
عندي.
خد بقى مع دا.. قناة الجزيرة اللي الناس كانت معتبراها وحي رباني وقتها.. وبتصدق كل حرف بيكذبه فيصل القاسم وأحمد منصور وباقي حثالة البشر الجواسيس إياهم.. خد على دا خطب القرضاوي.. خد على دا الدعم الأمريكي.. خد على دا الدعم التركي.. خد الدعم القطري.. وقل لي:
“هي أمريكا بتدعمك في ثورتك في سوريا ليه”؟؟
إمتي أمريكا كان قلبها على الشعوب العربية بالضبط؟
يا ريت ماتقوليش بقى تاني “ثورة”.. و”ابتدت سلمية”…
يا ريت تبطل تحاول تشتغل نفسك إنه “الجيش السوري صحا فجأة في ٢٠١٢ و قرر يقصف المدنيين لأول مرة في تاريخه…
يا ريت تعرف بتتكلم عن إيه.. و بتدعم مين.. بدل ما تتحول لدمية.. بيلعبوا بيك كل شوية زي ما هم عايزين..
إبقى إرجع للمراجع و لما تلاقي السلمية.. ابقي سلملي عليها..
علي فكرة زي مانت شايف في الصورة.. “الستات” كانت بتحارب عشان تدافع عن بلدها..
تدافع ضد الجولاني وأشباه الرجال.. اللي باعوا ارضهم بالرخيص واتفقوا على تسليمها لاسرائيل.
و أنت لحد دلوقتي قاعد تقولي: “ثورة سوريا المجيدة”.. و”المعارضة المسلحة المعتدلة” و”الثورة نجحت”…!
كل واحد دعم الجولاني وعصابته في أي مرحلة وقالك ثورة ونجحت.. هو خادم لاسرائيل.. خدمها خدمة العمر وكان جزء من خطتها…
سواء خاين بأجرة او لمجرد انه عبيط.
مابتفرقش.
للخيانة وجوه كثيرة.
#awareness_against_terrorism #awareness_against_السرسجة
==================================
مراجع:
#awareness_against_terrorism
نارام سرجون 