شو تذكرت و عم أتذكر وقت عم شوف بتول ..و هي عم تتهاجم من هالذئاب و المرتزقه و التافهين يلي ما عندن ذرة شرف و لا كرامه انسانيه ..

تذكرت لما اعتقلوني و لزقوني تهم ما أنزل الله بها من سلطان ..و صار الرايح و الجايه متل الكلب يعوي عليي نفس هالأنماط القذرة و البشعه يلي حولين بتول ..

و رئيس القسم الجنائي الشيخ محمد الزعبي صار يلولح بصرمايته هالصرمايه بوشي و يسب و يشتم و يصرخ و يشنهق متل الحمار و يقلي نحنا مو متل نظام بشار الأسد و بدنا نربيك و يسبني كأني مجرمة هالواطي عديم الإنسانية و الرجوله و ضربني هالواطي و تكاتر عليي أنا و مكلبشة هو و شي عشرة ووحده حقيرة خرمشت بناتي و ضربتن و شدت شعرن و كانو بدن يعتقلوهم أسمها ميرفت لانو قاومت سرقتي أنا و مكلبشه و كانت بدها تسرق ذهبي يلي لابسته هي وواحد اسمو اسماعيل الزعبي و الشيخ رئيس القسم محمد الزعبي و توسلت الن لحلو عن بناتي و تركوهن و كانو جايين بناتي لياخذو جوالي و الأمانات طبعا فتشو جوالي ليشوفو مع مين حكيت كان من ضمن يلي حكيت معن بوقتا الأستاذ أنور البني عالماسنجر ، و بالمقابل كان في بنت رجل اعمال محبوسه لأنو زوجها متورط بقصة فساد عم يبوس صرمايتها و يدللها لأنو عم يسحب من ابوها كومة مصاري و ذهب .. و انا صفقتلو هو وعم يجعر بكل هدوء و التلو برافوووو برااافو يا شيخ كل شي عم يتسجل ..

طبعا بعتني ع سجن كفر سوسه ..مين مديره يا حزركن كان واحد اسمو ابو فيصل من نواحي يبرود كان تاجر مخدرات و يشتغل بالشرطه وقت النظام السابق ..قام لما غضبو عليه و انشق و راح عند اخواتن المجرمين بالطرف التاني ..قام بعد السقوط سلموه السجن هالمجرم ..تخيلو يا حبيباتي يا أخواتي ..و هاد كان كل بنت تدلق حالها و صدرها و جسدها يصحلها فرصه تطلع لعندو و تتنفس و تحكي مكالمات مع مين ما بدها … و ع اساس الدخان ممنوع كان ريحه القرف و الدخان متل مكان للتحشيش و القرف بمكان ضيق 6 غرف تنتين منن لكبار العاهرات و المختلسات و النصابات ..هدون vip معامله خاااصه .. و الباقي 120 بنت ملحوشين بالكريدور و الغرف …

شفت بنت مربوط لسانها ..ليش يا حزركن .. لأنو كانوا عم يعذبو شب بطريقه وحشيه قام البنات استنفروا و صارو يعيطو ويقولو حرام و هيك بيرفع مسدسو عليها هالإرهابي المحقق و بتوقع بيغمى عليها و بعدها مربوط لسانها بتحكي تأتأه تحسنت شوي قال وقت كنت كان صرلها شهرين مربوط لسانها..

تذكرت لما فتت عالسجن و لقيت بنات مغتصبات من طرف حدا مدعوم منن و كاتبينن دعااارة و هنن طاهرات عم يبكو بحرقة قلب و منهم أمهات .. وحده منهم مسكتني و عم تبكي بحرقه قالتلي أمانه اطلعي بوشي أنا وش دعارة ..التلها أنتي طاهره و قديسه ..كانت عم تفوت بحالات انهيار عصبي و جسمها هزيل و اصفر من الهم و الظلم و الوجع ..

شفت وحده حامل بتوم أسمها سيبان ..كانت عن تنزف من القهر ووضعها الغير انساني ..ملامحها كلها طيبه و حنيه و قهر ما عم تروح من بالي ..

شفت صبيه عراقية اسمها أسامه مريضة كبد مرض معدي ووضعها سيء جدااا جدااا كان شكلها شبح صفرااا و هيكل عظمي..تعرضت للاغتصاب و الضرب لمدة اسبوع نجت بأعجوبه …هربت وقت كان في فرصه و احتالت ع مغتصبها ..راحت ع اقرب مغفر بالكسوة تم اعتقالها هي و مغتصبها ..كان صرلها 3 شهور بلا دوا بلا شي و ملحوشه بين السجينات وضعها خطر عليها وعليهن ..ما بعرف اذا بقيت عايشة ..لانو وجهها و جسدها بيقول انها شبه ميته ..و عم تستنجد و تصرخ و تطلع تقلن و لا حياة لمن تنادي..

في قاصر عمرها 16 سنه مرضعة أميه طيوووبه طفله كان معها مرهم السماط تبع ابنها و ابنها بيلحشولا ياه عند الجاره و صدرها يومين صار متل الحجر و عم تتألم .. كانت هي وجوزها نازله عالشام بيمسكوها هي و زوجها و هووب بيزتوها بالسجن هي وزوجها كان احتياط وقت النظام السابق فما نزل عالشام بالمحكمة ثبت الزواج .. لحشوها يومين بالسجن ع بين ما يثبتو اهلها و بيت حماها الزواج بالمحكمه ..

في أم عمرها ١٩ اسمها أم يوسف شفتها بسجن المحكمه من كتر شعور القهر الساعه ٢ بالليل صارت تخبط عالباب بدها سيكاره و عم تبكي هجمو عليها ٤ وحوش كل واحد اد الحمار و نزلو فيها ضرب و شبحوها من المسا للصبح عالباب بقيت شهر ملحوشه بالفرشة من الوجع و التكسير مو قدرانه تتحرك ..بس لأنها عبرت عن غضبها هي المخلوقه كانت عم تستلم مصاري من رفيق زوجها لتروح تزور زوجها بالسجن و تعطيه ياهن ..بيكون سياره العار العام عم تجيب واحد بتهمة مخدرات بيقوفو السياره شو عم تعملو بنص الشارع المهم اخذوها هي و الشب و كتبولها هي الأم بنت العيله …شبهة دعاااارة ..تخيلو ..

تذكرت وحده منهم ما عم تروح من بالي و قالولي انها حامل من حدا مغتصبها من الأمن العام..و عم تدعي انو معها سرطان بالبطن من كتر وجعها النفسي و الروحي عم تقول هيك و ما عم تقول الحقيقه ..

شفت خمسه عشر أمرأة حامل من بين مئة و عشرين في ظروف غير انسانيه ..

شفت المجرمات كيف عم يدللو و عم يتعاملو VIP و البنات المظلومات و الملبسات تهم عن ينهانو ..

شفت مرا شاميه راقيه بنت عيله معروفه و بنتها بكلوريا شاحطينها هي و بناتها لأنو رجعت ولاد بنتها يلي خاطفن صهرها من حضن أمن من أوروبا و هو مطلوب للأنتربول و هنن تعذبو و انضربو عالدواليب و جسمن متل النيله و الكسر بعيونن ما عم يروح من بالي و الأم دافعه للحج و خايفه يروح عليها و البنت البكلويا و مستقبلها ..ما بعرف شو صار معها ..

شفت بنت قاصر عمرها ١٥ سنه تعرضت للاغتصاب و اشتكت قام حبسوها ..شفت المجرمات صاحبات السوابق عم يحنحنو عليها و مياله الهم حتى مره كانو عم يقلولها بدنا نعلمك شي بيخص المخدرات مالي حافظه المصطلحات ..قالتلن بدي جرب و الله ..مسكتها التلها ديري بالك انتي بنت عيله و حظك الزفت جابك لهون اصحححك و لا تفكري تفكير ..بس شو بدها تعمل كلمتي و هي بيناتن ..

شفت بنات طاهرات كانو سهرانين عند قرايبينن ..و رجعو بالليل متأخر نزلوهن و كشفو عليهم بطريقه غير اخلاقيه …و مو وحده هاد الحكي سمعته من عده معتقلات و بدي ركز ع كلمة معتقلات ..معتقله يعني مظلومة مضطهده ما الها صوت ..

و بعدين كماااان اهم شي ممنوع الزيااارااات بنوووب بنوووب ..

ممنوع الدعم النفسي ..و اتحدى أي جمعية أو دعم نفسي أو جمعيات دعم مرأة أو نساء يسمح لهم بزيارة هالسجون يلي مليانه ظلم و ظلام ..

طبعا المحامي العام حسام خطاب الو الدور الاساسي و الرئيسي في التوقيع على زج النساء و البنات في السجون

هي شهادتي أمام الله و أمام كل صاحب ضمير حي ..و ياويلو من الله يلي بيعرف و بيقدر يساعد و ما بيتحرك لأنو أشهدت الله على ما قلت و خصيمته أمام الله عن كل امرأة أو مظلوم في غياهب الجب لا يعلم ألمه ووجعه إلا الله عم يتجاهل أو يتشارك بظلمه ..

من رأى منكم منكرًا فليغيرْه بيدِه فإن لم يستطعْ فبلسانِه . فإن لم يستطعْ فبقلبِه . وذلك أضعفُ الإيمانِ

بعهد الهارب كل يوم بدعي للمعتقلين و من وقت السقوط ما وقفت دعواتي للمعتقلين و المحاصرين و المظلومين في كل مكان أن يفرج الله همهم و يفك أسرهم .. آمين

======================

رابط المقال:

https://www.facebook.com/story.php?story_fbid=1667664665145906&id=100057071666758&post_id=100057071666758_1667664665145906&rdid=8i9OSmstfYpoAVlv